Tónleikakynning: Storgård, Dariescu, Bruckner og Clara Schumann!

Það er spennandi tónlistarkvöld fram undan fimmtudaginn 19. nóvember! Finnski hljómsveitarstjórinn og fiðluleikarinn John Storgårds stjórnar annarri sinfóníu Bruckners og Alexandra Dariescu leikur píanókonsert Clöru Schumann. Bæði verkin hljóma nú í fyrsta sinn hjá Sinfóníuhljómsveit Íslands. Storgårds bregður sér líka í hlutverk einleikara í rómönsum Clöru.

Við í Vinafélaginu hefjum kvöldið með tónleikakynningu kl. 18:00, þar sem Egill Arnarson, heimspekingur og ritstjóri, leiðir okkur inn í efnisskrána. Kynningin fer fram í Hörpuhorni, fyrir framan Eldborg á 2. hæð Hörpu, þar sem hægt er að kaupa ljúffengar veitingar.

Kynningarnar eru skemmtileg leið til að kynnast tónlistinni betur, fá ný sjónarhorn og hitta aðra tónlistarunnendur áður en sest er í salinn.

Komið og njótið kvöldsins með okkur!